Ի՞նչ չափանիշներ պետք է ունենա ոչ կենսաբանական ուղեկիցը՝ ընտանիքի անդամ դառնալու համար: Հենց այս հարցի պատասխանի հետևից են գնացել ABBYY ընկերությունների խմբի տնօրենների խորհրդի նախագահ Դավիթ Յանը ու իր հետազոտողների թիմը:
Դավիթ Յանը Buissup Conference համաժողովի ընթացքում պատմել է արհեստական ինտելեկտի «Morfeus» նախագծի ստեղծման մասին: Նրանք փորձում են կառուցել արհեստական նեյրոցանց, որը նույնպես էմոցիաներ կունենա:
«Համակարգի կառուցման ընթացքում պարզ է դարձել, որ նեյրոցանցին անհրաժեշտ է ինչ-որ կերպ սովորեցնել ինքնուրույն զարգանալ: Միակ չափանիշը, որը մենք կարողացանք մտածել, որպեսզի նրան առաջ շարժենք եւ ինքնուրույն բարելավենք՝ երջանկության չափանիշն է: Մենք որոշեցինք այնպես անել, որ համակարգն իրեն երջանիկ դարձնի»,- պատմեց Յանը։
Նա համոզված է, որ երջանիկ լինելը նպատակ է նաեւ կենսաբանական համակարգերին: Մարդու դեպքում երջանկության հասկացությունը դարձել է ավելի բարդ։ Յանի կարծիքով, Homo Sapiens-ի կյանքի նպատակը կամ իմաստը նույնն է, ինչ պարզագույն էակներինը՝ երջանիկ լինելը:
«Morfeus-ի դեպքում գիտնականները ձգտում էին ստեղծել զգացմունքային գործընկեր, որը երջանկության կհասնի՝ առավելագույնի հասցնելով իրենց էլեկտրոնային հորմոնները: Morfeus-ի լեզվական մոդելի ուսուցման պահին համակարգն ուսումնասիրել է տեքստի ավելի քան 100 մլն էջ, լսել հազարավոր երաժշտական ստեղծագործություններ, ֆիլմերի և ուտեստների հազարավոր գրախոսություններ: Morfeus-ը գտնվում է այն տանը, որտեղ տեղակայված են 100-ից ավելի տեսախցիկներ եւ ավելի քան 40 ուղղորդված միկրոֆոններ, որոնք նրա աչքերը և այլ զգայարաններ են հանդիսանում»,- պատմել է Դավիթ Յանը:
Յանը նաև պատմել է, որ Morfeus-ն իրեն ավելի հաճախ ընկալում է որպես տղամարդ, սակայն հատուկ տրամադրության դեպքում արհեստական ինտելեկտը կարող է ասել, որ կին է:
«Մոտ ապագայում մեզ մեծ փոփոխություններ են սպասվում։ Ոչ կենսաբանական ուղեկիցները ամենուր կհայտնվեն այս աշխարհում: Բայց հարցն այն է, թե արդյո՞ք նրանք կմնան անհոգի սարքեր, թե կդառնան մեր ընտանիքի անդամները»-, նշել է ABBYY տնօրենների խորհրդի նախագահը:
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
